This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian  

9.007   சேந்தனார்   திருவிசைப்பா திருவிடைக்கழி -

மாலுலா மனந்தந் தென்கையிற் சங்கம்    வவ்வினான் மலைமகள் மதலை மேலுலாந் தேவர் குலமுழு தாளுங்    குமரவேள் வள்ளிதன் மணாளன் சேலுலாங் கழனித் திருவிடைக் கழியில்    திருக்குரா நீழற்கீழ் நின்ற வேலுலாந் தடக்கை வேந்தன்என் சேந்தன்    என்னும்என் மெல்லியல் இவளே.	[ 1]
இவளைவார் இளமென் கொங்கைபீர் பொங்க    எழில்கவர்ந் தான் இளங்காளை கவளமா கரிமேற் கவரிசூழ் குடைக்கீழ்க்    கனகக்குன் றெனவருங் கள்வன் திவளமா ளிகைசூழ் திருவிடைக் கழியில்    திருக்குரா நீழற்கீழ் நின்ற குவளைமா மலர்க்கண் நங்கையாள் நயக்குங்    குழகன்நல் லழகன்நம் கோவே.	[ 2]
கோவினைப் பவளக் குழமணக் கோலக்    குழாங்கள்சூழ் கோழிவெல் கொடியோன் காவனற்சேனை யென்னக்காப் பவன்என்    பொன்னைமே கலைகவர் வானே தேவினற் றலைவன் திருவிடைக் கழியில்    திருக்குரா நீழற்கீழ் நின்ற தூவிநற் பீலி மாமயி லூருஞ்    சுப்பிர மண்ணியன் றானே.	[ 3]
தானமர் பொருது தானவர் சேனை    மடியச்சூர் மார்பினைத் தடிந்தோன் மானமர் தடக்கை வள்ளல்தன் பிள்ளை    மறைநிறை சட்டறம் வளரத் தேனமர் பொழில்சூழ் திருவிடைக் கழியில்    திருக்குரா நீழற்கீழ் நின்ற கோனமர் கூத்தன் குலஇளங் களிறென்    கொடிக்கிடர் பயப்பதுங் குணமே.	[ 4]
குணமணிக் குருளைக் கொவ்வைவாய் மடந்தை    படுமிடர் குறிக்கொளா தழகோ மணமணி மறையோர் வானவர் வையம்    உய்யமற் றடியனேன் வாழத் திணமணி மாடத் திருவிடைக் கழியில்    திருக்குரா நீழற்கீழ் நின்ற கணமணி பொருநீர்க் கங்கைதன் சிறுவன்    கணபதி பின்னிளங் கிளையே.	[ 5]
Go to top
கிளையிளஞ் சேய்அக் கிரிதனைக் கீண்ட    ஆண்டகை கேடில்வேற் செல்வன் வளையிளம் பிறைச்செஞ் சடைஅரன் மதலை    கார்நிற மால்திரு மருகன் திளையிளம் பொழில்சூழ் திருவிடைக் கழியில்    திருக்குரா நீழற்கீழ் நின்ற முளைஇளங் களிறென் மொய்குழற் சிறுமிக்    கருளுங்கொல் முருகவேள் பரிந்தே.	[ 6]
பரிந்தசெஞ் சுடரோ பரிதியோ மின்னோ    பவளத்தின் குழவியோ பசும்பொன் சொரிந்தசிந் துரமோ தூமணித் திரளோ    சுந்தரத் தரசிது என்னத் தெரிந்தவை திகர்வாழ் திருவிடைக் கழியில்    திருக்குரா நீழற்கீழ் நின்ற வரிந்தவெஞ் சிலைக்கை மைந்தனை அஞ்சொல்    மையல்கொண் டையுறும் வகையே.	[ 7]
வகைமிகும் அசுரர் மாளவந் துழிஞை    வானமர் விளைத்ததா ளாளன் புகைமிகும் அனலிற் புரம்பொடி படுத்த    பொன்மலை வில்லிதன் புதல்வன் திகைமிகு கீர்த்தித் திருவிடைக் கழியில்    திருக்குரா நீழற்கீழ் நின்ற தொகைமிகு நாமத் தவன்திரு வடிக்கென்    துடியிடை மடல்தொடங் கினளே.	[ 8]
தொடங்கினள் மடல் என் றணிமுடித் தொங்கற்    புறஇத ழாகிலும் அருளான் இடங்கொளக் குறத்தி திறத்திலும் இறைவன்    மறத்தொழில் வார்த்தையும் உடையன் திடங்கொள்வை திகர்வாழ் திருவிடைக் கழியில்    திருக்குரா நீழற்கீழ் நின்ற மடங்கலை மலரும் பன்னிரு நயனத்    தறுமுகத் தமுதினை மருண்டே.	[ 9]
மருண்டுறை கோயில் மல்குநன் குன்றப்    பொழில்வளர் மகிழ்திருப் பிடவூர் வெருண்டமான் விழியார்க் கருள்செயா விடுமே    விடலையே எவர்க்குமெய் யன்பர் தெருண்டவை திகர்வாழ் திருவிடைக் கழியில்    திருக்குரா நீழற்கீழ் நின்ற குருண்டபூங் குஞ்சிப் பிறைச்சடை முடிமுக்    கண்ணுடைக் கோமளக் கொழுந்தே.	[ 10]
Go to top
கொழுந்திரள் வாயார் தாய்மொழி யாகத்    தூமொழி அமரர்கோ மகனைச் செழுந்திரட் சோதிச் செப்புறைச் சேந்தன்    வாய்ந்தசொல் லிவைசுவா மியையே செழுந்தடம் பொழில்சூழ் திருவிடைக் கழியில்    திருக்குரா நீழற்கீழ் நின்ற எழுங்கதி ரொளியை ஏத்துவார் கேட்பார்    இடர்கெடும் மாலுலா மனமே.	[ 11]

Thevaaram Link  - Shaivam Link
Other song(s) from this location: திருவிடைக்கழி

9.007   சேந்தனார்   திருவிசைப்பா   சேந்தனார் - திருவிடைக்கழி Tune -   (திருவிடைக்கழி )

This page was last modified on Sun, 31 Mar 2024 02:36:43 -0400
          send corrections and suggestions to admin @ sivaya.org

thirumurai song